Yangiliklar
Pedagoglar safari: Shvetsiya taʼlimidan - O‘zbekiston uchun yangi g‘oyalar
October 06 , 2025
189
Butunjahon o‘qituvchilar kuni munosabati bilan Nordik training markazi Oliy ta'lim, fan va innovatsiyalar vazirligi huzuridagi Oliy ta'lim tizimi kadrlarini qayta tayyorlash va malakasini oshirish instituti bilan hamkorlikda va Shvetsiyadagi O‘zbekiston elchixonasi va Milliy madaniy markaz (rahbari Zilola Yulchiyeva) ko‘magida 21 nafar o‘zbekistonlik professor-o‘qituvchi uchun Stokgolm shahridagi Salems munitsipalitetiga tashrif uyushtirdi.
Dastlab delegatsiya aʼzolari Fågelsångens maktabida direktor Laura Erdtman va jamoa tomonidan samimiy kutib olindilar. Uchrashuvda maktabdagi pedagogik innovatsiyalar va rivojlantirish tajribalari, ta’lim jarayonlari va zamonaviy uslublar bilan tanishildi, sinf xonalari hamda o‘quvchilar uchun yaratilgan sharoitlar ko‘zdan kechirildi.
Salems kutubxonasiga tashrifda o‘quvchilarga ko‘rsatilayotgan xizmatlar, kitob fondi, bolalarni kitobxonlikka jalb etish tajribasi bilan yaqindan tanishildi.
Centrum för flerspråkighet - ko‘p tilli lingvistika markazida Shvetsiya ta’lim tizimi hamda ko‘p tillilikni qo‘llab-quvvatlash tajribasi o'rganildi.
O‘zbekistonlik ustozlar ham o‘z ta’lim tajribalari va yangiliklar haqida ma’lumot berib, savol-javob va muhokamalarda faol ishtirok etdilar. Shvetsiya taʼlimidagi nazariya va amaliyot uyg‘unligi, o‘qituvchilar hamkorligi, inklyuziya, barqaror rivojlanish hamda mustaqil tahlil qobiliyatlariga eʼtibor qaratilishi xususida maʼlumotlar olindi.
Tashrif ikki tomonlama hamkorlikni mustahkamlash, xalqaro tajribaga tayangan holda malaka oshirish va kelgusida qo‘shma loyihalar uchun muhim zamin yaratdi. Shvetsiya tajribasi O‘zbekiston maktablari uchun innovatsion yondashuvlar, dars dizayni, ko‘ptillilik, ekologik ong, kreativ yondashuv va o‘quvchilarning rivojlanishi bo‘yicha yangi g‘oyalar manbai sifatida xizmat qiladi. Yangi O‘zbekiston loyihalaridan biri sifatida taʼlim yo‘nalishidagi ushbu harakat va imkoniyatlar yosh avlodni yetakchi, jamiyatga tayanch kuch sifatida tarbiyalashga poydevor yaratadi.
Delegatsiya tashakkur sifatida Salems kutubxonasi va ona tili markaziga o‘zbek tilidagi bolalar kitoblarini sovg‘a qilishdi. O‘zbek madaniyati haqida maʼlumotlar berib, milliy matolar va serquyosh zamin mevalaridan hadyalar berishdi.
So'nggi yangiliklar
Tabassum, gullar va samimiy ehtirom: Nordikda 8-mart tantanasi
Nordik xotin-qizlari erkaklar tomonidan bayramona kayfiyatda gullar, samimiy tilaklar va iliq eʼtibor bilan tantanali kutib olindilar. Ular uchun maxsus tayyorlangan yo‘lakdan tabriklar, tilaklar qurshovida o‘tish jarayoni chinakam bayram ruhini yaratdi — har bir qadam tabriklar, gul ifori va quvonchli tabassumlar bilan bezandi.
Yo‘lak to‘rida esa ayollarni bayramona fotozona qarshi oldi. Bu yerda ular hayajon, quvonch va samimiy kulgular bilan o‘z ismlari bitilgan doska oldida esdalik suratlariga tushdilar.
Bayram dasturi yanada rang-barang va mazmunli kechdi. Tadbir mehmoni sifatida taniqli xonanda, hajviy ko‘rsatuvlar muallifi va shoumen Zokir Ochildiyev davraga o‘zgacha kayfiyat olib kirdi. Uning quvnoq chiqishlari, latifalari va sahna hazillari zalni kulguga to‘ldirib, tadbirga jo‘shqin va samimiy muhit bag‘ishladi.
Shuningdek, mehmon sanʼatkorlarning ijrolari, kuy-qo‘shiqlari davraga yanada yuqori kayfiyat va bayram shukuhi olib kirdi.
Tadbir davomida universitet rektori hamda jamoa erkak ustozlari ayollarga bo‘lgan hurmat va ehtiromlarini nutqlar, samimiy tabriklar, dilbar sheʼrlar, maxsus tayyorlangan premyera qo‘shiq va videoklip orqali izhor etdilar. Bayram yakunida esa ayollarga esdalik sovg‘alari topshirildi.
Bu kun Nordik xotin-qizlari uchun alohida ehtirom va qadrlash ramziga aylangan. Bayram davomida ular doimgidan ham yuksak hurmat, mehr, quvonch va xushnudlik og‘ushida bo‘ldilar. Zal esa kulgi, qarsaklar va shodon kayfiyatga to‘lib, davra fayzi yanada ortib bordi.
Shu tariqa Nordikda yana bir yorqin, samimiy va esda qolarli kun tarix sahifasiga muhrlandi.
Tabassumlar, quvonchlar va baxtiyor lahzalar bilan to‘la bu go‘zal damlar esa esdalik suratlariga ham muhrlandi.
“Zebo” loyihasida bahs qizidi!
Munozarada ishtirokchilar ikki jamoaga bo‘linib, sun’iy intellektning turli qirralarini asosli dalillar bilan himoya qildilar. Bir jamoa SI tufayli yuzaga kelishi mumkin bo‘lgan ishsizlik, axborot xavfsizligi muammolari va inson omilining kamayishi kabi fikrlarni ilgari surdilar. Ikkinchi jamoa esa sun’iy intellektning ilm-fan, innovatsiya va mutlaqo yangi kasblarni yaratishdagi ulkan imkoniyatlari haqida dalillar keltirdilar.
Qizg‘in bahslarga boy o‘tgan munozarada qatnashchilar nafaqat bilim, balki mantiqiy fikrlash, tezkor tahlil va notiqlik mahoratini ham namoyon etdilar.
O‘zining aniq dalillari va ishonchli nutqi bilan Muborak G‘ayratova “Eng yaxshi spiker” nominatsiyasida g‘olib bo‘ldi.
💬 Sizningcha-chi?
Sun’iy intellekt insoniyat uchun eng katta imkoniyatmi yoki yangi xavflar boshlanishimi?
Izohlarda fikringizni yozing — bahsni birga davom ettiramiz!
AI — ustoz va talabalarning aqlli yordamchisiga aylanmoqda
Trening davomida ishtirokchilar generativ sun’iy intellekt qanday ishlashi, AI yordamida referat, loyiha va taqdimotlarni tez, tizimli va sifatli tayyorlash usullari bilan tanishdilar.
Shuningdek, professional darajadagi prompt yozish sirlari — ya’ni AI’dan aniq va samarali natija olishning muhim qoidalari amaliy misollar orqali ko‘rsatib berildi.
Mashg‘ulotda akademik halollikni saqlagan holda AI’dan foydalanish tamoyillari ham alohida muhokama qilindi. Turli vazifalar uchun qaysi AI vositasi eng samarali ekani real misollar asosida tahlil qilindi.
Natijada talabalar izlanish, tahlil qilish va ilm olish jarayonini yanada samarali tashkil etish bo‘yicha yangi bilim va ko‘nikmalarni egalladilar.
Yangi hamkorlik: xalqaro tajribalar — milliy taraqqiyot uchun
Uchrashuv davomida davlat boshqaruvi, ta’lim va innovatsiyalarni rivojlantirishga qaratilgan istiqbolli yo‘nalishlar muhokama qilindi.
Muzokaralarda AQSh va Shimoliy Yevropa, xususan Finlandiyaning samarali davlat boshqaruvi va kasbiy ta’lim tizimidagi ilg‘or tajribalarini mahalliy sharoitga moslashtirish masalasiga eʼtibor qaratildi.
Finlandiyaning yetakchi ta’lim markazlari va davlat organlarida qisqa muddatli malaka oshirish dasturlari va stajirovkalar tashkil etish, sanoat korxonalari uchun maqsadli malakali kadrlar tayyorlash tizimini rivojlantirish xususida so‘z bordi.
Muzokaralar davomida istiqbolli hamkorlikni boshlab beruvchi O‘zaro anglashuv memorandumi imzolandi.
Endilikda hamkorlik doirasida “yashil” va “aqlli” boshqaruv tamoyillariga asoslangan yangi tashabbuslarni amalga oshirish rejalashtirilmoqda.
Shuningdek, hamkorlikda yoshlar salohiyatini oshirish va iqtidorli yoshlarni qo‘llab-quvvatlash bo‘yicha yangi tashabbuslarni amalga oshirish, hududlarning barqaror rivoji uchun xalqaro grant va investitsiyalarni jalb qilish mexanizmlarini kengaytirishga kelishildi.